ករណីក្លែងឯកសារ បំភាន់ភ្នែកនាយករដ្ឋមន្ត្រី យកដីតំបន់៣ចំនួន៥៣០ហិកតា ដើម្បីធ្វើប័ណ្ណកម្មសិទ្ធ
30-November-2018 | ដោយ ពលមនសិការ
កំពង់ឆ្នាំង៖ បុគ្គលចិត្តធំ២នាក់ ឈ្មោះ ចឹម បច្ចុប្បន្នមានទីលំនៅភូមិពាមជំនីក ឃុំកំពង់ហ្លួង ស្រុកពញាឮ ខេត្តកណ្ដាល និងឈ្មោះ វ័រ វណ្ណនី មានទីលំនៅបច្ចុប្បន្នភូមិជ្រោយអំពិល សង្កាត់ក្បាលកោះ ខណ្ឌច្បារអំពៅ រាជធានីភ្នំពេញបានរៀបឯកសារថាខ្លួនជាតំណាងប្រជាជន៥០គ្រួសារ រស់នៅភូមិកង្កែប ឃុំច្រណូក ស្រុកកំពង់លែង ខេត្តកំពង់ឆ្នាំង។
បានធ្វើឯកសារស្នើរសុំធ្វើប្លង់កម្មសិទ្ធដីតំបន់បី(ដីរដ្ឋហាមឃាត់)ស្នើទៅតាមរយៈ ឯកឧត្តម ទេសរដ្ឋមន្ត្រី រដ្ឋមន្ត្រី ក្រសួងរៀបចំ ដែនដីនគរូបនីយកម្ម និងសំណង់ ទៅលើដីដែលមានទំហំ៥៣០ហិកតា មានទីតាំងនៅភូមិកង្កែប ឃុំច្រណូក ស្រុកកំពង់លែង ខេត្តកំពង់ឆ្នាំង។
តែប្រហែលជាមិនដូចបំណងទេមើលទៅពីព្រោះថា ចំណារបស់ឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំង បានចាត់ឲ្យលោក លី ឡា នាយខណ្ឌរដ្ឋបាលជលផលកំពង់ឆ្នាំង ចុះទៅពិនិត្យជាក់ស្តែងលើឯកសារ និងទីតាំងជាក់ស្ដែង តើវាមានផលប៉ះពាល់អ្វីខ្លះនៅចំណុចនោះ។
នៅព្រឹកថ្ងៃទី២៩ ខែវិច្ឆិកា ឆ្នាំ២០១៨នេះ ក្រោយពេលប្រជុំពិភាក្សាជាមួយប្រជាជនទាំង៥០គ្រួសារ ជាក់ស្តែងជាលទ្ធផលឃើញថាក្នុងចំណោមប្រជាពលរដ្ឋដែលមកចូលរួមនោះអ្នកដែលមានឈ្មោះក្នុងលិខិតស្នើសុំនោះ គឺមានតែឈ្មោះ២៦នាក់ តែប៉ុណ្ណោះ ដែលមានឈ្មោះក្នុងបញ្ជីស្នើសុំរបស់បុគ្គល២នាក់ ដែលតាំងខ្លួនជាអ្នកតំណាង។
ហើយក្នុងចំណោម២៦នាក់ ដែលមានឈ្មោះក្នុងលិខិតស្នើសុំធ្វើប្លង់កម្មសិទ្ធ នោះមានតែ៥នាក់ តែប៉ុណ្ណោះដែលអញ្ជើញមកក្នុងកិច្ចប្រជុំនោះ។
លោក លី ឡា នាយខណ្ឌរដ្ឋបាលជលផលថ្មី បានបញ្ជាក់ថាឈ្មោះពួកគាត់ទាំង០៥នាក់មានពិតមែន! តែត្រង់មេដៃពិតឬមិនពិតទាន់តែធ្វើកោសល្យវិច្ច័យទៅលើមេដៃនោះទើបដឹងច្បាស់លាស់។
លោក លី ឡា គាត់បានសួរពីគោលបំណងរបស់ប្រជាជនទាំង០៥នាក់នោះ ថាតើផ្ដិតមេដៃស្នើសុំនោះមានបំណងអ្វី...?ពេលនោះពួកគាត់បានឆ្លើយថាគាត់មានបំណងត្រឹមស្នើសុំចូលទៅឈូសឆាយដើម្បីបង្កបង្កើនផលតែប៉ុណ្ណោះ គឺមិនបានផ្ដិតមេដៃអោយទៅបុគ្គល(ចឹម សុខឡេង និងវ័រ វណ្ណនី)ដើម្បីស្នើសុំឲ្យធ្វើប្លង់កម្មសិទ្ធទេ។
ជុំវិញករណីខាងលើនេះលោក លី ឡា នាយខណ្ឌរដ្ឋបាលជលផលកំពង់ឆ្នាំង បានបញ្ជាក់ប្រាប់ (អ្នកសារព័ត៌មាន) ថាឯកសារដែលបុគ្គលទាំង២នោះបានស្នើសុំធ្វើប្លង់កម្មសិទ្ធ ទៅ សម្ដេចនាយករដ្ឋមន្ត្រី ហ៊ុនសែន គឺជាការ(ក្លែងគោលបំណងអ្វីមួយហើយ)។
ដូច្នេះគាត់នឹងរៀបចំធ្វើរបាយការណ៍ដាក់ជូនទៅឯកឧត្តម ឈួរ ច័ន្ទឌឿន អភិបាលនៃគណៈខេត្តកំពង់ឆ្នាំង ជាបន្ទាន់ដើម្បីទប់ស្កាត់ភាពអវិជ្ជមានដែលត្រៀមនិងកើតឡើង។
សូមបញ្ជាក់ថា ក្នុងកិច្ចប្រជុំនៅសាលាឃុំច្រណូក ស្រុកកំពង់លែង ខេត្តកំពង់ឆ្នាំង នាព្រឹកថ្ងៃទី២៩ ខែវិច្ឆិកា ឆ្នាំ ២០១៨នេះ លោកអភិបាលស្រុកកំពង់លែង និងលោក លីឡា នាយខណ្ឌរដ្ឋបាលជលផល បានធ្វើការអំពាវនាវទៅដល់ប្រជាពលរដ្ឋទាំងអស់ ក្នុងខេត្តកំពង់ឆ្នាំង សូមមេត្តាកុំកាប់ឆ្ការុករានទន្ទ្រានយកដីព្រៃលិចទឹក ដែលជាតំបន់ហាមឃាត់ឲ្យសោះហើយបើមានបុគ្គលណានៅតែប្រព្រឹត្តពួកគាត់នឹងចាត់វិធានការចំពោះផ្លូវច្បាប់ដោយមិនមានការយោគយល់នោះឡើយ។
ម្យាងទៀតបើជ្រាវឃើញថាបុគ្គលទាំងពីរនោះបានក្លែងបន្លំឯកសារភូតកុហក នាយករដ្ឋមន្ត្រី តើច្បាប់ត្រូវគិតបែបណាចំពោះបុគ្គលនោះ...? ជុំវិញករណីខាងលើនេះ មិនអាចសុំការបំភ្លឺ ពីភាគីម្ខាងទៀតបាននោះទេ៕
ចំនួនអ្នកទស្សនា
- ថ្ងៃនេះ13281
- ម្សិលមិញ11441
- សប្តាហ៍នេះ43111
- ខែនេះ158261
- ឆ្នាំនេះ158261
- សរុប20600717